កែប៖ កំពង់ផែទេសចរណ៍ កែប-កោះទន្សាយ ក្រុងកែប ខេត្តកែប ត្រូវបានបើកសម្ពោធឱ្យប្រើប្រាស់ជាផ្លូវការ សម្រាប់បម្រើដល់វិស័យទេសចរណ៍ និងដឹកជញ្ជូននៅក្នុងខេត្តមួយនេះ។
នៅថ្ងៃទី១៩ ខែមករា ឆ្នាំ២០២២ ក្រោមការអញ្ជើញជាអធិបតីរបស់លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ក្នុងពិធីបើកសម្ពោធដាក់ឱ្យប្រើប្រាស់ជាផ្លូវការនូវកំពង់ផែទេសចរណ៍កែប-កោះទន្សាយ ដែលបានសាងសង់ដោយអគ្គនាយកដ្ឋានផ្លូវទឹក ផ្លូវសមុទ្រ និងកំពង់ផែ និងត្រួតពិនិត្យបច្ចេកទេសដោយអគ្គនាយកដ្ឋានបច្ចេកទេស នៃក្រសួងសាធារណការនិងដឹកជញ្ជូន។
កំពង់ផែថ្មីមួយនេះ មានរចនាបទទំនើប ព្រមទាំងអាចទទួលនាវាទេសចរណ៍ធំៗចំនួន ៣គ្រឿង ដែលក្នុង១គ្រឿង អាចផ្ទុកអ្នកដំណើរចំនួន១៥០នាក់ និងទូកទេសចរណ៍តូចៗមួយចំនួន។
កំពង់ផែនេះ ត្រូវបានសាងសង់លើទីតាំងកំពង់ ផែចាស់មានផ្ទៃក្រឡាសរុប ៣.៤៧០ម៉ែត្រការ៉េ និងមានផ្លូវបេតុងចូលផែទំហំ ១៣មx១០០ម និងអគាររដ្ឋបាលទំហំ ១០មx៣០ម ដោយរួមបញ្ចូលទាំងអគាររដ្ឋបាលលក់សំបុត្រ និងអគារអ្នកដំណើររង់ចាំ និងបានចំណាយថវិកាជាតិសរុបចំនួន ៤ ៨៨០លានរៀល ស្មើនឹងប្រមាណ ១ ២០០ ០០០ដុល្លារអាមេរិក។
កំពង់ផែទេសចរណ៍កែប-កោះទន្សាយនេះ ដើរតួនាទីយ៉ាងសំខាន់ក្នុងការផ្តល់សេវាដឹកជញ្ជូនជូនអតិថិជន ក៏ដូចជាបង្កើតការងារធ្វើ និងបង្កើនជីវភាពរស់ជូនប្រជាពលរដ្ឋនៅក្នុងខេត្តកែបទាំងមូល មានទីតាំងឋិត ក្នុងភូមិសាស្រ្តឆ្នេរ ប្រកបដោយសម្រស់ធម្មជាតិដ៏ស្រស់ត្រកាល ជាមួយនឹងការកែលម្អក្រុង និងការសាង សង់ហេដ្ឋារចនាសម្ព័ន្ធថ្មីៗជាច្រើនបន្ថែមផងដែរ។ ក្នុងពេលអនាគត កំពង់ផែនេះ នឹងអាចទទួលនាវាទេសចរណ៍ច្រើនជាងនេះទៀត នៅពេលជីកស្តារឃ្លងផ្លូវនាវាបានជ្រៅបន្ថែមទៀត៕